قصہ ساڑھے چہار درویش، لالہ صحرائی جی کے قلم سے-

ہمارے محترم ظفر جی نے قصہ چہار درویش لکھا-
جس میں انهوں نے خان صاحب، قادری صاحب، شیخ رشید اور شاہ محمود کے لتے لئیے ہیں-

اس تحریر کے بعد پی ٹی آئی کے اہل قلم بهی قلم اٹھانے پر مجبور ہوئے اور قصہ ساڑھے چہار درویش زیب قرطاس کیا-

فدوی ادب کی دنیا کا ایک نالائق ترین طالب علم ہے-
ظفر جی کا قصہ چہار درویش
اور لالہ جی کا جواب قصہ ساڑھے چار درویش پڑھ کر دل کو تسلی سی ہوئی کہ مملکت خداداد کے بیٹوں میں ادب کا ذوق باقی ہے- اور غم بهی ہوا کہ یہ ادبی صلاحیت بدذوق سیاستدانوں کی نذر ہوئی جا رہی ہے-

میری دونوں نوجوان لکھاریوں سے اپیل ہے نوجوان نسل کے سدهار کیلئے اپنے أقلام کو جنبش دیجئے- اور ایک ایک غیر سیاسی تحریر لکھ کر ہمیں بہرہ مند فرمائیں-

اس تحریر کا مقصد سیکھنا ہے- کسی لکهاری کی ذاتی توہین نہیں-

ملاحظہ فرمائیں ظفر جی کے قصہ چہار درویش کا مدلل جواب لالہ جی کے قلم سے:

قصہ ساڑھے چار درویش (حصہ دوئم)

تحریر لالہ صحرائی:

--------------------------------------------------------------

حصہ دوئیم

کتھا پہلے درویش کی

پہلا درویش کہ یکتا توڑ جوڑ میں تھا، واسطے اپنی چالاکیوں کے بہت مشہور اور معتبر گردانا گیا زمانے بھر کا تھا، سارے درویش اس کو درویش اعظم بھی مانتے تھے اپنی بتیسی نکال کر ھنسا اور گویا ھوا
ھیھیھیھی شناتا ھوں بھائیو شناتا ھوں

پھر دو زانو ہو بیٹھا اور اپنی سیر کا قصہ اس طرح سے کہنے لگا
متوجہ ہو کر سنو اے ساکنان بزم
ماجرا اس بے سروپا کا سنو اور انصاف کیجیو زرا

" یا اللہ یا معبود میں تو ٹھہرا بے قصور"
میں سردار خطہء بھٹائی کا ھوں، پیشہء آباء میرا زمینداری اور سیاست میں بھی راہداری تھی، میں ایک دن باغ میں اپنے گھوڑے کو مربہ بادام کشمش اور شٹالہ کھلا رھا تھا کہ ایک بادشاہ زادی جو ملک فرنگ سے پڑھ کر آئی تھی، ایک نظر اس کی مجھ پر پڑی اور پتا نہیں کیا ادا پسند آئی کہ میں اسے بھاء گیا، واسطے نکاح کے پیغام اس کا سن کر ٹھکانہ خوشی کا نہ تھا، بعد عقد کے جس سے مجھے ایک بیٹا ملا جو مقصد تعلیم کے ملک فرنگ بھیجا

آج وھی لڑکا واپس آکر جب کہتا ھے "زندہ ھے مرد زندہ ھے" تو لوگ اس کی لچک دیکھ کر ھنستے ھیں، یہ میری زندگی میں تیسرا بڑا جھٹکا تھا، پہلا اس وقت لگا جب یہ سامنے بیٹھا بھینس نما دوسرا درویش، دو نمبر کا درویش زرا سی چشمک میں مجھے سالہا سال کے لئے قید خانے میں ڈال گیا تھا

دوسرا جھٹکا اس وقت لگا جب میری زوجہء اقدس کو بیچ راہ کے شہید کر دیا، میں غم سے نڈھال کوہِ گراں اٹھائے کھڑا تھا لیکن پھر میں نے حوصلہ کر کے اس قاتل کو سلام کیا کہ اس نے مجھے وعدہ راج گدی دینے کا کیا تھا، بادشاہ بن کر بھی مجھے سکون تھا نہ چین تھا، بیوی کے غم میں کچھ کھاتا تھا نہ پیتا، دبلا بلا کا ھو چکا تھا کہ ایک پیر مرد نے کہا اسے کھانے کی ھر چیز دکھاؤ جو کھانے کا من کرے وہ اسے جی بھر کر کھانے دو

بعد اس تجویز کے میرے سامنے دنیا بھر کا نعمت کدہ معہ خزانہ قوم کا کیا تو میں نے اسے کھانا شروع کر دیا

ھیرے، جواھر، موتی آبدار، لعل، نگینے، زمرد، پکھراج، نقد مال و سیم و زر، اشرفیاں، سکے، ٹکے، آنے، پائیاں سب کھاتا چلا گیا، جیسے جیسے مال کھایا اور کھلایا برسوں کی بھوک مٹتی گئی اور چہرے میرے اور ساتھیوں کے سب کے سب مانند انار سیستانی و کشمیری کھلنے لگے، میرے ساتھیوں نے محل شاھی اور دربار شاھی سے ھر خزانے تک سرنگیں کھود رکھی تھیں، اور رات دن مال نکال نکال کر ملک سوئیستان بھیجتے رھے جہاں جہاں سے خزانہ خالی ھوتا وھاں لکڑیاں، پتھر، اینٹ گارا، ریت بجری، ڈال کر پر کرتے رھے کہ خزانہ خالی ھونے کا گمان کسی کو نہ گزرے کیونکہ دونوں ھاتھوں سے لوٹو تو حقیقت ھے اگر گنجِ قارون ہو تو بھی پورا نہ پڑے، ساتھ ھی ساتھ فرنگی بزرگ کامل سفید کھال، سفید ریش، روشن چہرے والے نے اس اجاڑ گردی پر الگ سے انعام کالانعام، مال و متاع اور شاباش نذر کی کہ ھم نے اس کیساتھ بھی حق وفا خوب ادا کیا تھا

شاھی محل میں آدمی ہر ایک عہدے کے تعینات ہیں کہ خبرگیری خدمت ھماری خوب کئے رکھتے تھے، بعد مدت قیام ختم ھونے کے کسو نے خوشی سے نہ کہا کہ جاؤ سرکار بلکہ سب روتے بلکتے تھے کہ نہ جاؤ، لیکن ھم کیا کرتے ھماری مدت شاھی ختم ھو گئی تھی اور باری دوسرے درویش کی شروع ھونے والی تھی

ایک اھلکار معتبر سر پر سر پیچ اور گوش پیچ اور کمر بندی، باندھے ایک عصا سونے کا جڑاؤ ہاتھ میں اور ساتھ اس کے کئی خدمت گار، معقول عہدے لیے ہوئے اس شان و شوکت سے میرے نزدیک آیا اور ھماری عادت کو دیکھتے ھوئے کہا کہ اپنی مدت شاھی میں جو تم نے چاھا وہ کیا تو اب جاتے ھوئے جو کچھ اسباب اوڑھے بچھانے کا اور کھانے کے باسن، روپے سونے کے، اور جڑاؤ کے، اس محل میں ہیں، یہ سب تمہارا مال ہے، اس کے ساتھ لے جانے کی خاطر جو فرماؤ تدبیر کی جائے، کیونکہ آنے والے نے یہ ویسے بھی پھینک کر سب کچھ نیا خرید کرنا ھے، میں نے کہا جو تمھاری مرضی، تمھارا دل نہیں توڑ سکتے پھر جتنا اسباب اس محل شاھی میں تھا، شطرنجی، چاندی، قالین، ستیل پانی، منگل کوٹی، دیوار گیری، چھت پردے، چلونیں، سائبان، نم گیرے، چھپر کھٹ مع غلاف، اوقچہ، توشک، بالا پوش، سیج بند، چادر تکیے، تکینی، گل تکیے، مسند، گاؤ تکیے، دیگ دیگچے، پتیلے، طباق، رکابی، بادئیے، تشتری، چمچے، بکاؤلی، کف گیر، طعام بخش، سرپوش، سینی، خوان، پوش، تورہ پوش، آبخورے، بجھرے، صراحی، لگن، پان دان، چوگھرے، چنگیر، گلاب پوش، عود، سوز، آفتابہ، چلمچی سب میرے حوالے کیے کہ یہ تمہارا مال ہے چاہو اب لے جاؤ، نہیں تو ایک کوٹھڑے میں بند کر کر اپنی مہر کرو، جب اگلی باری آؤ تو پھر لے جائیو جو تمہاری خوشی وھی ٹھیک ھے، ان سب کے تم مالک مختار ہو۔ جو چاہو سو کرو

ھم نے رعیت کو کبھی نہیں بھولا سب کچھ اسی کے لئے کیا، ھم سلامت ھونگے تو ان کا کچھ سوچیں گے، یہی سوچ کر اول اوائل میں مضبوط اپنے آپ کو خوب کیا، پھر کچھ دھیلے خواجہ سگ پرست کو دیئے واسطے خرچ پتے عوام کے اور شکر خدا کا بجا لائے، مہم اپنی انجام کو پہنچی، بخیر وعافیت اور ساتھ اطمینان کے ھر کوئی خوش تھا سوائے آزاد بخت کے

آزاد بخت کو مل بیٹھ کر کھانے کے بجائے درد عوام کا کودا تھا، ھمارے دستر خوان تو ویسے بھی ایسا وسیع تھا کہ سو آزاد بخت اور آن بیٹھیں تو کچھ کم نہ پڑے، پر اس سادہ انسان کو فقط عوام کی پڑی تھی، اب عوام کو لئے مارا مارا پھرتا یہاں تک آن پہنچا ھے پر

؎ اب پچھتائے کیا ھوت جب کھوت چر گئے کھیت

اب ھم سے کھایا پیا اگلوانے چلا آیا بیٹھا ھے اور پوچھتا ھے اتنی دولت کہ جس کا قبالہء تصرف تمھارے نام ھے وہ کہاں سے آئی اور کیسی ہے؟ ھو نہ ھو تم نے شاھی محل سے لُوٹی ھے، عوام کا حق دے دو، عوام کا حق دے دو، ارے بھائی عوام کا حق ھم نے بیچوں بیچ خواجہ سگ پرست کتوں والے کے حوالے کر دیا تھا، اب کاھے کا حق باقی رہ گیا ھے میاں

آآآآہہہ وقت گزر گیا مگر وہ عیش و عشرت یاد ھے کہ فرنگی بادشاھوں کو بھی ایسی عیش و عشرت میسر نہیں جیسی ملک جناح کے شاھی محل میں ملتی ھے لیکن اس آزاد بخت نے آن کر ناک میں دم کر رکھا ھے

تو پنواڑیو میرے بھائیو
اب علاج آزاد بخت کا ذمے تمھارے ٹھہرا کہ پیٹ تمھارے ساتھ بھی لگا ھوا ھے جس کی کفالت ذمے ھمارے رھی بس تمھارے اوپر فرض کئے دیتا ھوں علاج اس آزاد بخت کا اور یہ تھی میری کہانی ھمارے ساتھ انصاف کیجیو بھائیو

کتھا دوسرے درویش کی
================
پہلے نے دوزانو بیٹھ کر بغیر وضو کے اپنی کتھا سنائی تو دوسرا وضو کیوں کرتا چنانچہ دوسرے درویش نے چارزانوں بیٹھ کر کہ، وہ جنگلی بھینس سا بھاری بھر کم انسان، دوزانوں بیٹھنا جس کا محال تھا یوں گویا ھوا

سنو خلق خدا درویش اعظم نے جو کہا ..... واللہ حرف بحرف سچ کہا

اے دلق پوشو ...... یہ عاجز حقیر فقیر بونگا بچہ ایک ترکھان کا ھے، خاندانی کام والد صاحب کا ھمارا چھان بـُورا، چھان ٹُــکر خریدنے کا تھا جسے بھٹی میں پگھلا کر پھر سے روٹی بناکر بیچتے تھے، ہفت اقلیم میں اس کام کے برابر کوئی دوسرا کام نہ تھا، مجھ سے چھوٹا بھائی کہ ستارہ آفتاب اور ساتوں کواکب میں نیر اعظم ھے اس وقت سستی روٹی بنا کر بیچتا تھا لیکن مجھے یہ کام سخت ناپسند تھا

میرے قبلہ گاہ نے لڑکپن سے قاعدے اور قانون علم و حکمت کی تربیت کرنے کے واسطے بڑے بڑے دانا ہر ایک علم اور کسب کے چن کر میری اتالیقی کے لیے مقرر کیے تھے تاکہ تعلیم کامل ہر نوع کی پا کر قابل قبول بنوں، لیکن خدا کے فضل سے بیس برس کے سن و سال میں سب علم سے جان چھڑا کر امراء سے جان پہچان کرنے چل نکلا، ھرگاہ کہ کسی کو یہ کام پسند نہ تھا مگر میں کسی کے ھاتھ نہ آیا حتیٰ کہ کئی سال بعد میری مراد بھر آئی

میں اِدھر اُدھر حقِ آواراگی پورا کرتا پھرتا رھا، جان پہچان بہت بنا گیا تھا بیچ امراء اور شاھی خاندانوں کے کہ ایک دن ایک جرنیل خرقہ پوش ھمراہ نیزے تیر و تفنگ معہ لاؤ لشکر مجھے ڈھونڈتا آن پہنچا، استاد پھجے کے ٹھیئیے پہ، کہ بغرض "نہار خوری" بوقت دوپر ایک بار وھاں میرا جانا ضرور ھوتا تھا

جرنیل مذکور نے شاھی محل لیجا کر مجھے حمام بھیجا بعد اس کے خلعت شاھی سے نوازا اور مرتبہ سرکار میں وزیر کرنے کا قصد کیا، جب اسے پتا چلا کہ مجھے حساب کتاب "ککھ" نہیں پتا تو خوش ھو کر وزارت خزانہ کا قلمدان میرے ھاتھ دیا اور محل شاھی میں رھائیش جاری کرنے کا حکم فوری اذن کیا

میری تباہ کاریوں سے خوش ھو کر مرکزی جرنیل نے مجھے اپنا بیٹا بنا لیا اور اپنے بیٹے کو میرے ماتحت قرار دیا، اس عزت افزائی کو دیکھ کر قبلہ والد صاحب نے مرکزی جرنیل مذکور سے کہا اب یہ آپ کا ھی بیٹا ھے میرے تو ویسے بھی کسی کام کا نہ تھا، قبلہ گاھی کے لہجے کی تلخی دیکھ کر میں نے عرض کی ابا حضور آپ "چنتا" مت کیجئے میں سارے قرض چکا دوں گا، آپ کا چھوٹا سا چھان بُورے کا کاروبار دنیا بھر میں پھیلا دوں گا، اور خدا کے فضل و کرم سے بادشاہ بنتے ھی ایسا کر کے دکھا دیا

مجھے کئی بار بادشاہ سلامت بنایا گیا مگر ھر بار ایک سے ایک نئی ڈھینگ مارنے پر چلتا ھونا پڑا، اب آپ کو تو پتا ھی ھے شاھی امور سلطنت کتنا "اوکھا" کام ھے اس لئے درویش اعظم نے جس قید و بند کا ذکر کیا وہ اھتمام میں نے جان بوجھ کر نہیں کیا تھا، بس چوک ھوگئی، مجھے سہواً ایسا ھو گیا، جس کے لئے میں شرمندہ ھوں اور اس حال درپیش مشکل سے نجات کا راستہ چاھتا ھوں، جب سے آپ تاج و تخت میرے حوالے کر کے گئے ھیں اس آزاد بخت نے میرا جینا حرام کیا ھوا ھے اس کی کوئی راہ تلاش کرو

ویسے اللہ کے فضل و کرم سے میں نے واسطے اس کا زور توڑنے کے طلسمی پانی منگوایا ھے، ھندو پنڈت نے کہا ھے دم کیا ھوا پانی ھم بھیج دیں گے، نالے بھر بھر اس پانی کے پہنچا دیجیو ملک کے کونے کونے میں اور چھڑک دیجیو ھر قریہ قریہ، بستی بستی، نگر نگر جہاں سے آزادبخت کے دیوانے نکل نکل کے آتے ھیں، جب ساری بستیاں " رُڑ " جائیں، پانی میں بہہ جائیں تو وھاں کے بھوکے پیاسوں کو روٹی پہنچائیو اور وفادار اپنے رھنے کی تلقین کیجئیو تو تیرا بیڑا پار ھوگا

؎ لیکن بھائیو جب قسمت ھوجائے جھُڈو، تو کیا کرے گا اونٹنی کا دُودھو

زرد بیل پر چڑھ کر جہاں جہاں بھی بھائی روٹی لے کر جاتے تو ناھنجار لوگ ان کا منہ چڑاتے، گالیاں دیتے، آزاد بخت کے دیوانے ایسے ھی بات بے بات گالیاں دیتے ھیں، اب بھلا یہ کوئی بات ھے کہ روٹی دینے گئے بندے کو گالیاں دی جائیں اور جا درویش جا کے نعرے لگائے جائیں، حالانکہ جب دیہاتی عورتیں اپنے کسان کی روٹی لے کر کھیتوں میں جاتی ھیں تو وہ خوش ھوجاتے ھیں، لیکن اس کمی کارے کو ایک تو روٹی دو اوپر سے باتیں بھی سنو، کیا دھرا یہ سارا اسی آزاد بخت کا ھے جس نے خواب ترقی کے دکھا رکھے ھیں جبکہ ترقی کرنا صرف درویشوں کا حق ھے ھر چوھڑے چمار کا نہیں

بے شک، بے شک، حق فرمایا اے درویشِ گھمبیر سخن، تو سچ کہتا ھے، کہاں ھم اشرف الاشراف خاندانی لوگ کہاں یہ کمی کمین رعیت، سارے درویشوں نے ھاں ملائی اس کی ھاں میں اور فغاں ملائی اس کی فغاں میں

اخلاقی گینڈے نے شراب کا گھونٹ بھر کر وجد میں سر دھنتے ھوئے کہا بات خوبصورت انتہا کی کہی ھے عالم پناہ کسی بھی مذھب میں مرد کا منہ چومنا جائز نہیں ..... واللہ ..... ورنہ اتنی پیاری بات کہنے پر آپ حق رکھتے تھے کہ منہ چوما جائے آپ کا

ایک شرمیلی فروٹی جوسی حسینہ نے اخلاقی کمان دار مصاحب کا شوقٍ چـُمن چـماٹی انگڑائی لیتے دیکھا تو ایک ھوائی چـُمن اپنے یاقوتی ھونٹوں سے روانہ بہ خدمت اقدس کیا جسے ھونٹوں میں رکھ کر بھنبھوڑتے ھوئے گینڈے نے ماءاللحم دوآتشہ کا ایک نیا جام انڈیلا اور کہا، دل چھوٹا نہ کیجئے عالم پناہ، ھم آپ کے ساتھ ھیں جناب، ھم آپ کے ساتھ

کتھا تیسرے درویش کی
===============
اپنی کتھا پیش کرتا ھوں دوستو، زرا کان لگا کر سنو
تیسرے درویش نے اُکڑوں بیٹھ کر قوت گویائی جمع کی کہ بندہ بہت اکڑو تھا جہاں بھر کا، اس لئے اکڑ کر بولا

مجھ ایسا نابغہء روزگار، سرد گرم چشیدہ، کمر خمیدہ، اوصاف حمیدہ کئی سال پہلے دنیا میں جب وارد ھوا تو گھر میں خوب چراغاں ھوا، پورے شہر میں لوگوں نے اپنے خرچے پر مٹھائیاں بانٹیں کہ ھمارے آقا مرشد سرکار کی محنت سے ھمارے بچوں کے لئے بھی آنے والے وقت کا ایک آقا اور پیدا ھوگیا

میرے ولی نعمت وہاں بادشاہ تھے اور سوائے میرے کوئی فرزند لاڈلہ نہ رکھتے تھے، اسی لئے میں بگڑتا چلا گیا، میں جوانی کے عالم میں مصاحبوں کے ساتھ چوپڑ، گنجفہ، شطرنج، تختہ نرو کھیلا کرتا تھا یا سوار ہو کر سیر و شکار میں مشغول رہتا

گردش زمانہ نے والدین کا رکھا ھوا نام کہیں گم کردیا اور رعایا مجھے ہاضمی کے نام سے یاد کرنے لگی، وجہ تسمیہ اس اجمال کی یہ ٹھہری کہ ھر لکڑ ہضم پتھر ہضم قسم کا معدہ پایا ھے لیکن کوئی راز کی بات اس پیٹ میں نہیں ٹھہرتی

بچپن مین امی حضور نے چوبی مہد میں لیٹانا شروع کیا تو میں پنگھوڑے کا ایک بازو ہی چبا گیا، امی جان فرماتی ھیں کہ یہ پنگھوڑا مُلک پرستان سے دو پریاں چھوڑ کے گئی تھیں واسطے اس فقیر کے

فقیر جوانی میں ایک دن ان پریوں کی تلاش میں روانہ ھوا، بہت مارا مارا پھرتا رھا بجز اس کے کوئی تلاش نہ تھی کہ ان پریوں کو ڈھونڈ کر شکریہ ادا کروں، ھرچند پرستان کا راستہ معلوم نہ تھا پھر بھی منہ اٹھا کے جیدھر سینگ سمایا نکل پڑا، جیدھر ھمت ھوئی چل پڑا

راستے میں ملاقات ایک سیاسی پنڈت سے ھوئی جس کے پاس ایک گھن چکر وزیر کی کمی تھی اس مرد دانا نے مجھے حق مہر شرعی بتیس ٹکے آٹھ آنے کے عوض وزارت شاہی کا قلمدان تھما دیا، مہر شرعی کم تھا لیکن نان نفقہ کی بہتات تھی، جب کھا کھا کے میرا منہ بھر گیا تو فقیر کو اونگھنی آگئی، جب بندے کا پیٹ بھر جائے تو اونگھنی آ جاتی ھے اس وقت تھوڑا عرصہ سو لینے سے بندہ پھر تروتازہ ھو جاتا ھے

اس لئے فقیر نے "کلٹی" ماری اور اونگھنے کے لئے ایوان حکومت کا منہ چڑا کر واپس اپنے گھر چلا گیا، پھر ایک دن گھر سے نکلا تو ایک بزرگ ثابت ثبوت صورت نظر آئے، بزرگ نے سمجھا بجھا کر اپنی دینی جماعت میں داخل کیا تاکہ سدھر جاؤں لیکن غیرت سادات جاگی اور گویا ھوئی سید بادشاہ کو غیر سید کے آگے نہیں جھکنا چاھئے دوسرا وھاں لیٹیاں لگانے کا کوئی سربندھ نہیں تھا اس لئے فقیر کا من نہیں لگا اور چپکے سے "کلٹی" مار کے جماعت سے باھر نکل آیا

ویسے بھی ان دنوں ایک دوسرا کھابا کھلنے والا تھا، ایک "شکاری بادشاہ" نے سرکاری بادشاہ سے تاج و تخت چھین کر جب اپنا دسترخوان لگایا تو فقیر کو بلا کر پھر بتیس ٹکے آٹھ آنے بعوض حق مہر شرعی مجھے قلمدان ایک وزارت کا تھما دیا، میں پہلے بھی اس معاوضے پر کام کر چکا تھا اس لئے پریشانی کی کوئی بات نہیں تھی اور نان نفقہ بھی بے حدوحساب تھا اوپر سے میں ٹھہرا ہاضمی، لکڑ ہضم پتھر ہضم قسم کا معدہ پایا ھے جس میں عام طور پہ ھر چیز ہضم ھو جاتی تھی لیکن راز کی بات اس میں نہیں ٹھہرتی تھی

میں کئی بار بادشاھوں کے ساتھ رھا اور جب چاھتا "کلٹی" مار کر نکل جاتا، اتنی بار "کلٹی" مار کر دکھانا آسان نہیں ھوتا مگر میرے لئے بہت آسان تھا اس لئے کہ میری زنبیل میں ایک طلسمی انگوٹھی تھی جو بچپن میں ایک پری مجھے تحفے میں دے گئی تھی جس میں "کلٹی مار" مونگا جڑا ھوا تھا ، میرے چاھنے والے لوگ ھمیشہ میری "کلٹی" مار حرکتوں پر خوش ھوتے لیکن اب بہت ناراض ھیں اس کی وجہ یہی آزاد بخت ھے، میں کبھی آزاد بخت کے ساتھ نہ ملتا لیکن میرے ساتھ اس دوسرے درویش نے بہت بُرا "دھروؤ" کیا تھا

یہ دوسرا درویش خوب جانتا ھے کہ اس کی سرکار میں دونوں بار میں شامل تھا، اس ناھنجار کا میں نے بہت ساتھ دیا، حتیٰ کہ جب ایک شکاری بادشاہ نے اس کی مقعد شریف پر ٹھڈے مار کر اسے دربدر کر دیا تو میں واحد بندہ تھا جو اس شکاری کے سامنے ڈٹ گیا اس نے مجھے زندان میں ڈال کر مہر قید کی ثبت کی، میں پھر بھی نہیں گھبرایا

جب یہی درویش ملک عرب کی خاک میں چھان بُورے کے کارخانے لگا کر عیش کر رھا تھا تو اس وقت بھی میں یہاں قید و بند کی صعوبتیں اٹھا رھا تھا مگر اس طوطا چشم نے جب واپس آکر زنا کی ایک نئی قسم "نوازنا" متعارف کرائی تو سب کو انعام کالانعام ملا، اس وقت مجھے اس نے "نوازنا" تو کیا تھا الٹا پیچھے پٹخ دیا

اس وقت مارے غصے کے مجھے "کلٹی" مارنے کی سوجھی اور میں کلٹی مار گیا، ایک خواجہ سگ پرست نے میری بہت منتیں کیں لیکن میں ماننے والا نہ تھا کیونکہ آزاد بخت نے مجھے اپنے باپ جیسی عزت دینے کی ٹھان لی تھی اور اس نے ایسا کر کے بھی دکھایا

میں آزاد بخت کے ساتھ ویسے تو بڑا خوش تھا لیکن ایک دن خواجہ سگ پرست نے جب "کلٹی" مارنے کا یاد کرایا اور ساتھ ھی لخلخہ سنگھایا تو میرا دماغ کھل گیا، اس نے مجھے یہ بھی بتایا کہ دوسرے درویش کو بڑی اچھی عقل آگئی ھے، وہ آپ کو بہت یاد کرتا ھے اور آپ کو "نوازنا" بھی چاھتا ھے تو میں آزاد بخت کو " اوا- توا " بول کر وھاں سے سرپٹ بھاگا اور ساتھ ان پرانے درویشوں کے آن ملا

لیکن میرے ساتھ میرے برسوں کے ساتھی شہر والوں نے اچھا نہیں کیا، ان کم بختوں نے آزاد بخت کے کہنے پر میرا سر بالٹی میں دے کر خوب دھلائی کر ڈالی، ابھی تک چکر پہ چکر آ رھے ھیں

اب تم لوگ ھی انصاف کیجیو کہ بھلا مجھ سے "کلٹی" مارنے کا حق چھیننے کا کسی کو کوئی اختیار ھونا چاھئے؟؟؟ اس لئے واسطے اس بلا کے کچھ چارہ کرلو نہییں تو لوگ "کلٹی" مارنا بھول جائیں گے اور تاریخ ان لوگوں کو کبھی معاف نہیں کرتی جو "کلٹی" نہ ماریں

کتھا چوتھے درویش کی
================
ٓٓٓٓٓٓٓٓٓٓٓٓٓٓٓٓاے خلق خدا میری کہانی سنو اور انصاف کیجیو

میرا نام پنواڑی ھے اور میں پنواڑخانے میں پیدا ھوا تھا، میں فرد واحد نہیں بلکہ ملک جناح کے طول و عرض میں پھیلا ھوا ھوں، قلمکاری سے لیکر ایوان حکومت اور ھر شعبے میں پایا جاتا ھوں، دست درازی اور توڑ پھوڑ کا شوق سانحہء پیدائیش سے پہلے کا ودیعت کیا ھوا ھے اس لئے کوئی ساتویں ماہ تو کوئی آٹھویں ماہ ھر پابندی توڑ کر باھر آگیا اور خدا لگتی کہوں تو سنو کہ خدا جانتا ھے، یہ تینوں درویش بھی جانتے ھیں کہ خدا کے بعد میں ھی ان تینوں کا آخری سہارا ھوں

پہلے درویش نے دوزانوں بیٹھ کر اپنی کہانی سنائی، دوسرے نے چارزانوں بیٹھ کر اور اَکڑو درویش نے اُکڑوں بیٹھ کر اپنی کہانی سنائی، اب میرے پاس بجُز اس کے کوئی چارہ نہیں بچتا کہ میں الٹا لٹک کر کہانی سناؤں ویسے بھی جب تک میں الٹا نہ لٹکوں مجھے سیدھا نظر نہیں آتا

لیکن ٹھریئے زرا پہلے میں تہبند کے نیچے جانگیہ پہن کر آتا ھوں کیونکہ ایسی حالت میں الٹا لٹکا تو دھوتی نیچے گر جائے گی اور آپ سمجھیں گے میرے دماغ میں سوراخ ھے، پہلے ھی لوگ سوال پہ سوال کرتے ھیں کہ میرے دماغ میں کوئی بات آخر بیٹھتی کیوں نہیں، اوپر سے یہ حادثہ ھوا کہ پہلے پہل بے دھیانی میں آزاد بخت کے مجنؤوں کے سامنے ایسی قلابازیاں لگا کر بہت زلیل و خوار ھو چکا ھوں، بڑی شرمندگی ھوتی ھے جب اس کے پٹھان کہتے ھیں تمھارے دماغ میں سوراخ ھے لاؤ اس کا علاج کریں

ھاں تو میں کہہ رھا تھا کہ میں ھی ان تینوں کا آخری سہارا ھوں جب تک یہ سکہ اچھالتے رھیں گے میں ان کے ساتھ ھوں، چابی والے کھلونے اور مجھ میں کوئی خاص فرق نہیں ھے جو بات ایک بار میرے من میں بٹھا دی جائے میں وھی کرنے پر بضد رھتا ھوں خواہ دنیا ادھر کی ادھر ھو جائے کیونکہ میں غلام ابن غلام ھوں اور اپنی آنے والی نسلوں کو بھی ان ہی مہاپـُرکھوں کی غلامی میں دیکھنا چاھتا ھوں، خانہ زاد موروثی غلام ہوں جن کو راج دربار سے ھمیشہ سرفرزایاں بخشی گئی ہیں

میری طبیعت میں آپ جیسے بڑے لوگوں کو دیکھ کر حضور کا اقبال بلند رھے، دوارے بستے رھیں، مولا شہنشاہ بھاگ لگائے کہنے کی عادت گھٹی میں شامل ھے، آج کل میں نے "چـــمـوٹـا " چلانا چھوڑ دیا ھے اور قلم چلاتا ھوں، اس مقدس قلم سے میں آزاد بختوں کے ساتھ بیٹھی ان کی ماؤں بہنوں کو آوارہ اور بعض اوقات تو فاحشہ بھی لکھ دیتا ھوں، ایسی شقاوت قلبی پر میرے دل میں کہیں درد تو ھوتا ھے پر کیا کروں میرے گھر کا چولہا بھی اسی مزدوری سے چلتا ھے

اے خلق خدا انصاف کرنا کہ میرے آقاؤں اور ان کے بچے بچیوں کو رقص و سرود، شراب کباب کتنا سجتا ھے اور یہ جاھل آزاد بختی سڑک کنارے بیٹھ کر گانے بجانے کرتے کتنے بُرے لگتے ھیں

راز حق بھی کسی پر عیاں جب نہ تھا
تھا مگر تو ھی تو اللہ ھو اللہ ھو اللہ ھو
سے شروع کرتے ھیں اور پھر اس دیس کو نیا رنگ و روغن کرنے کے ترانے گاتے ھیں اور رات بھر ناچتے ھیں

علامہ اقبال نے ان جاھلوں کے بارے میں تھوڑا کہا تھا کہ

؎ کریں گے اھل نظر تازہ بستیاں آباد

وہ تو ھمارے آقاؤں کے بارے کہا تھا جنہوں نے اربوں توڑے اشرفیاں خرچ کر کے محلات بنائے، غلام بنائے، چہل قدمی کے لئے باغ بنوائے

ھم نے ادب سرائے پر بھی ایک احسان کیا ھے، اب کسی کو ڈھیٹ، بےشرم، بے حیا، جاھل کہنے کی بجائے ان سب معانی کو ایک ھی لفظ میں پرو دیا، اب اتنا کچھ کہنے سے بہتر ھے بندہ ایک پنواڑی کہہ کے حساب چکتا کرے جو کہنے سننے میں طبیعت پر بھی گراں نہیں گزرتا لیکن مقصد واضع کر جاتا ھے

میرے عزیز درویشو یہ ساری "کتے کھانی" میں نے تمھارے کنگرے گھسنے سے بچانے کے لئے برداشت کی ھے، دن رات ان آزاد بختوں سے منہ ماری کرتا ھوں صرف تمھاری خاطر، کس بات کی آزادئ چاھتے ھو تم، اس آزادی کے جھنجھٹ کو چھوڑ کر آؤ اپنے ان درویش صفت آقاؤں کے تلوے چاٹ کر کھاؤ پئیو موج کرو عیش کرو، ایویں خوامخواہ کا شورشرابہ بلند کیا ھوا ھے، بڑے لوگوں کی حاشیہ برداری کرنے کا اپنا ھی سواد ھے، ایسا میں ان کو سمجھاتا رھتا ھوں کس کے لئے، صرف تمھاری خاطر درویشو، صرف تمھاری خاطر، بس میرا وظیفہ دربار سے چلتا رھنا چاھئے بڑی مہربانی آپ درویشوں کی، درویشوں کا اقبال بلند رھے بلکہ ساجھا ، ماجھا، شادا سب بلند رھے

مارنا حاتم طائی کی قبر پہ لات کا
=====================
بتانے والا لکھتا ھے کہ ان درویشوں نے حاتم طائی کا قصہ سنا جس نے کسی غریب کی مدد کے لئے اپنے آپ کو اس غریب کے حوالے کر کے کہا، نوفل بادشاہ میرا دشمن ھے اس نے میرے اوپر پانچ سو اشرفیوں کا انعام رکھا ھے پس تم مجھے پکڑ کر اس کے دربار میں لے جاؤ اور انعام پا کر خوشحال ھو جاؤ، اس غربت سے تمھاری جان چھوٹ جائے گی، مگر وہ غریب یہ ظلم کرنے پر تیار نہ ھوا اسی بحث میں بات کسی اور کے کان پڑ گئی تو اس نے حاتم کو لے جا کر پیش کیا نوفل کے آگے، پیچھے پیچھے وہ غریب آن پہنچا اور فریاد کی کہ حاتم ایسا نیک انسان کسی سزا کا مستحق نہیں ایسے نیک دل انسان کو چھوڑ دو جو میری غربت دور کرنے کے لئے اپنے آپ کو تمھارے آگے ڈالنے پر راضی تھا مگر میں نے ایسا نہ کیا، غریب کی بات سن کر نوفل بہت شرمندہ ھوا اور حاتم طائی کو دوست بنا لیا اور غریب آدمی کو 500 اشرفی انعام دیا

پہلا درویش جب بادشاہ بنا تو یہ قصہ سن کر پھوٹ پھوٹ کر رویا اور خواجہ سگ پرست سے کہا عوام کے لئے کوئی بھلیائی کا کام کرو، بادشاہ کی بات سن کر خواجہ سگ پرست نے ھر غریب کو 6 سکے روز کے حساب سے 2500 سکے سال بھر کے لئے ھر ایک کو دیئے، اور اس کار خیر کا ثواب ملکہ مرحومہ کو پہنچانے کا قصد کیا

غریب آدمی شاہ کے دور میں ایک دن 6 سکوں سے آٹا لے لیتا، دوسرے دن گھی، تیسے دن، کھانڈ، گڑ، شکر، چوتھے دن نمک مرچ، پانچویں دن سبزی اور چھٹے دن دودھ اور ساتویں دن سب کچھ ملا جلا کر ھانڈی پکا کر کھا لیتا اس طرح شاہ کی مہربانی سے ھر غریب نے اس کے دور میں سال میں 53 بار ھانڈی پکا کر کھائی، یہ بہت بڑی لات اس درویش نے حاتم طائی کی قبر پہ ماری تھی، ضرور اس بیچارے کی چیخ نکل گئی ھو گئی کیونکہ اس نے تو صرف پانچ سو اشرفیوں سے غریب کی خدمت کی تھی اور درویش اقدس نے 2500 ھر غریب کو دیں، یہ ھوتی ھے درویش کی بادشاھی، واہ واہ

دوسرا درویش جب بادشاہ بنا تو وہ بھی اس قصے کو سن کر پھوٹ پھوٹ کر رویا اور خواجہ سگ پرست سے کہا عوام کے لئے کوئی بھلیائی کا کام کرو، بادشاہ کی بات سن کر خواجہ سگ پرست نے کہا ان غریبوں کو کوئی روزگار لے کے دیتئے ھیں، اس کے لئے بڑی رقم مال و دولت درکار ھے، اگر یہ دولت خزانے سے دی تو بڑا نقصان ھوگا، بڑی سوچ بچار کے بعد بادشاہ نے ایک ادھاریئے کو پکڑ کر آگے کیا اور لوگوں سے کہا اس سے رقم ادھار لے کر اپنا اپنا کام کرو،

خواجہ سگ پرست نے پیلے رنگ کے سواریاں ڈھونے والے چھکڑے بنوا کر لوگوں کو خریدوائے تاکہ وہ سواریاں ڈھو کر اپنا گزارہ کریں، محنت میں عظمت ھے اسی لئے سب غریبوں نے پیلے چھکڑے خرید کر سواریاں ڈھونا شروع کر دیں اور سُکھ چین سے اپنا گزاہ کرنے لگے، لیکن جب چھکڑے زیادہ اور سواریاں کم ھو گئیں تو ادھار کے پیسے واپس نہ کرسکنے کی وجہ سے آھستہ آھستہ اپنے چھکڑے ادھاریئے کے ھاتھوں کھو کر پھر بے روزگار ھوتے چلے گئے

یہ بھی پہلے درویش جیسی لات تھی جو حاتم طائی کی قبر پر سہواً جا لگی اور حاتم طائی کے علاوہ سارے لوگ ھڑبڑا گئے اور بادشاہ کی واہواہ واہواہ کرنے لگے، واہ واہ واہ واہ

قصہ خواجہ سگ پرستوں کا
==================
خواجہ سگ پرست کوئی ایک بندے کا نام نہیں، یہ ایک سوچ کا نام ھے جو ان درویشوں کے حکم کی تعمیل میں اپنی صلاحیتیں بدرجہءاتم بروئے کار لا کر پہلے بادشاہ سلامت کے کتوں کو کھلاتے ھیں پھر جھوٹا ان کتوں کا اپنی عوام کو کھلاتے ھیں پھر تسلی سے بادشاہ سلامت کے ساتھ بیٹھ کر لپا لپ دونوں ھاتھوں سے خود کھاتے ھیں، پھر بھی کبھی ان کا پیٹ نہیں بھرتا

کتھا بقیہ آدھے درویش کی
=================
چوتھے درویش کا قصہ جب ختم ھوا تو اصولاً محفل میں ایک اور رنگ شباب آنا تھا، مطرباء نے الوداعی لمحات سے پہلے، شروع محفل جیسا ایک سُر پھر سے چھیڑنا تھا جسے تان سَین سُن کر اپنی تانیں بھول جاتا اور بیجُوباورا سُن کر باؤلا ھوجاتا، خنجر جیسی پتلی کمریا لئے شرمیلی لچکیلی بل کھاتی نازنینوں نے جام بھر بھر درویشوں کے سامنے دھرنے تھے اور اخلاقی گینڈے نے اپنے ھونٹ کاٹتے ھویئے پھر ایک بار گنگنانا تھا

؎ کتھوں بھالدا ایں گول گول پُـٹھے کڑیاں کنواریاں دے

اور پھر پہلے کی طرح غٹاغٹ جام پہ جام لُنڈانے تھے مگر کباب میں ایک ھڈی آن پڑی

ایک کونے سے ایک غربت زدہ شخص اٹھ کر ھاتھ جوڑتا ھوا سامنے آیا اور کہا، درویشوں کا بھاگ سلامت رھے، جان کی اماں پاؤں تو کچھ عرض کروں

سب درویش ھکا بکا ایکدوسرے کو دیکھنے لگے، کسی سگ پرست نے پوچھا، اے میلے کچیلے، ھیچدان، کم ظرف انسان، تم اس محفل میں بنا نہائے دھوئے کیسے آن وارد ھوئے

بندے نے عرض کی حضور میں دھنی بخش نام رکھاتا سکنہ پِنڈ ٹُـڈِیـکے موضع عبدالحکیم کے پاس ضلع ملتان کا باسی ھوں اور منت اٹھا کر دربان کی بہت دور سے واسطے عرض گزارنے کے بہت پیدل سفر طے کر کے آیا ھوں، وھاں پیچھے بیٹھ کر آپ سب دربار سرکار کے درویشوں کی کتھا ھم نے دل و جان سے سنی، اب آپ ھماری
کتھا بھی سن لو خدا تمھارا بھلا کرے گا

اخلاقی گینڈے نے کہا درویشو، اس بندے کی بات سن لینی چاھئے، مفلوک الحال سائل ھے، کہو بابا کیا کہنا ھے

بندہ ھاتھ جوڑ کے دو قدم اور آگے بڑھا اور کہا حضور میں جب سے پیدا ھوا ھوں آپ کے ظلِ و سایہ میں نامراد ھی گھوم رھا ھوں، جب پڑھنے کا وقت تھا تب پڑہ نہ سکا، جب کمانے کا وقت تھا تب کما نہ سکا کیونکہ دونوں کاموں کے کرنے کا کوئی محل وقوع حاصل ھی نہیں تھا، ایسی کوئی سہولت ھوتی تو مستری کے ساتھ دیہاڑیاں نہ لگاتا کہیں منشی بن کے گزراوقات اچھی کر لیتا، پہلے اکا دُکا جو مزدوری ملتی کر لیتا تھا پھر ایک کھیت زمین جس پر والد بزرگوار کاشت کاری کرتے تھے بعد مُردن ان کے اب میں کاشت کر کے گزران کرتا تھا

ھندو کے پانی کا جو ترونکا اب ھمارے اوپر آن لگا ھے اس نے ھمیں کہیں کا نہیں چھوڑا، اب تو دمڑی کی ٹھڈیاں بھی میسر نہیں جو چبا کر پانی پیوں، دو تین فاقے کڑاکے کھینچ کر یہاں پہنچے ھیں، ہرگاہ میرے ساتھ پچیس لوگ اور مارے مصیبت کے باھر کھڑے ھیں، میں انہیں ٹھہرا کر باھر رون دھون منتیں کر کے دربان کی، فریاد گوش گزار کرنے اندر چلا آیا ھوں

آپ کے بھائی شہزادہ حضور ایک دن کی روٹی آن کر دے گئے تھے، ساتھ مصوروں نے تصویریں بنائی اور چلے گئے، اب بتلایئے کہ ھم باقی کے 364 دن کیا کھائیں

ھمارا کچھ بھلا کرو حضور، ایک کھیت ھمارا وہ بھی پانی میں ڈوب گیا، ھمارے ساتھ کوئی جمع پونجی تھوڑا ھی راکھی ھے، بھلا ایک کھیت کی آمدنی ھوتی ھی کتنی ھے، وہ سیانے کہتے ھیں ناں کہ

؎گنجی نے نہانا کیا اور نچوڑنا کیا

نامعقول ........... بے ادب گستاخ ......... حد ادب........... ایک دم سے کئی دبـکے لپکے بھری آوازیں ابھریں تو بندہ سہم کر تھوڑا پیچھے ھٹا، کن اکھیوں سے دوسرے درویش کی طرف دیکھ کر کہا حضور ناراض نہ ھوں ھم نے لفظ گنجی کا استعمال کیا ھے، پھر بھی معافی چاھتا ھوں

معافی مانگنے کا کچھ اثر نہ ھوا اور ایک مصاحب نے لخلخہ دواکھڑی سے اکھاڑ کر کھینچ کے سائل کو دے مارا، دھنی بخش نے لمبی جست لگائی اور بھاگ جانا ھی مناسب سمجھا، دیہاتی لمڈا، لمبا تڑنگا، ھڈی پسلی کا کھلا تھا اس لیئے یکبارگی لمبے لمبے ڈگ بھرتا اور جستیں لگاتا باھر نکلنے میں کامیاب ٹھہرا، ایک پہرے داروں چوبداروں کی ٹولی اس کے پیچھے بھاگی، مگر اس نے ھانک لگا کر ساتھ اپنے دوستوں کو لیا اور سرپٹ بڑی سڑک پر آگیا جہاں آزاد بخت کا اکٹھ موجیں مار رھا تھا، ھر چند کہ ان کے پیچھے ھوائی تیر بہتیرے چلائے گئے مگر خوبی تقدیر سے بچ بچا کر سب نکل گئے

آزاد بختوں کے اکٹھ میں پہنچ کر اس ٹولی کی سانس میں سانس اور دم میں دم آیا، چند لوگوں نے بھاگم بھاگم روٹی پانی لا سامنے رکھا، بھوکے پیاسے کئی دنوں کے گھاس پھوس کھاتے اجاڑ راستے طے کر کے پہنچے تھے سو کھانے پر پل پڑے

اتنے میں آزاد بخت اپنے تخت پر آن چڑھا، اس نے سنکھ نما آلہء آواز رساں اٹھایا اور کام شروع کر دیا، رات کے سناٹے میں اس کی گرجدار آواز گونجی اور شاھی محلات سے ٹکراتی ھوئی پائیں باغ میں ماحول بنا کر بیٹھے عیش کوش ٹولے کی سمع خراشی کرتے ھوئے پورے شہر میں پھیل گئی

اوئے درویشو
میں سب دیکھ رھا ھوں
عوام کے پیسوں پر تمھاری سب عیاشیاں میرے سامنے ھیں، میں تم سے عوام کا پیسہ اور چٹھی دست برداریء تاج و تخت لکھائے بغیر یہاں سے جانے والا نہیں
اوئے درویشو ..... سُنو

آزادبخت کی آواز سنتے ھیں پائیں باغ میں بیٹھے درویشوں کو "پدھیڑ" پڑ گئی، لگے سب بھاگنے اور کھسکنے کا چارہ کرنے

ساقی گری کرنے والی مہ جبینیں، نازنینیں گھبرا کر اپنے ھاتھوں سے سینے چھپا کر سرپٹ بھاگ اٹھیں، قلانچیں بھرتی ھوئی گئیں سر پہ دوپٹہ اوڑھنے کو اور درویشوں کے چہرے پہ ھوائیاں اڑنے لگیں، جو جام خوشی خوشی ٹکرائے جانے تھے وہ "ھبڑ دبڑ" میں ٹکرا کر ٹوٹنے لگے اور آزاد بخت کی گرجدار آواز سن کر ھر کسی کی "پیتی آن کی آن میں ایسے لییہ گئی جیسے کبھی پیتی ھی نہ تھی"

رات کے سناٹے میں ایک ھی آواز گونج رھی تھی

یہ جہاں جب نہ تھا آسماں جب نہ تھا
تھا مگر تو ھی تو، تھا مگر تو ھی تو
اللہ ھو اللہ ھو اللہ ھو
اللہ ھو اللہ ھو اللہ ھو

آزاد بخت کے من موجی دیوانے سر دھننے لگے، شاھی محل کے پاس پھیلی ھوئی کالی رات میں اللہ ھو اللہ ھو اور نئے دیس کے ترانوں پر آزادبختوں کو اس وقت تک محو رقص رھنا تھا جب تک اس کالی رات کی سحر نہ ھو

عبدلحکیم سے آنے والے آدھے درویش نے پاس کھڑے ایک آزادبختی سے پوچھا بھیا یہ کب تک کرنا پڑے گا، تو اس نے ناچتے ناچتے جواب دیا، تم نے آزاد بخت کو سنا نہیں، کیا کہا اس نے
اس وقت تک یہی کچھ ھوگا جب تک اس رات کی سحر نہیں ھوتی

دھنی بخش نے اپنے ساتھیوں کی طرف دیکھا پھر کچھ سوچتے ھوئے کہا
او ئے شروع تھی ونجو مَلۤو، پچھاں ول کے بھی کیا کریسوں، ایتھاں روٹی تے ملسی پئی

بھوک و افلاس کے ستائے ھوئے من موجی نئے دیس کی امید میں والہانہ ناچتے رھے اور چاروں درویش اپنے اپنے لحاف میں دُبکے نہ سو سکتے تھے نہ جاگ سکتے تھے اور اس عذاب سے ان کو کوئی چھڑانے والا بھی نہ تھا

رات کے پچھلے پہر تک اللہ ھو کی آواز آتی تھی یا پھر
جا درویش جا
جا درویش جا
جا درویش جا
جا درویش جا
جا درویش جا

Like